مج قهوة

الموضوع كله ابتدا بمج قهوة

الساعه 2 الصبح صحيت .وكالعادة يعنى هنام الصبح على 9 او 10 وهاصحى المغرب وهكذا

قررت انى اشرب مج قهوة .اللى مابحبهاش اصلا بشربها ايام الامتحانات بس

واغير نظام حياتى .اكسر الروتين يمكن المود يتغير شويه

عملت القهوة ووقفت فى البلاكونة اسمع فيروز

صوت فيروز مع لسعات البرد حسسونى انى قرارى كان صح من البدايه

كل ما الشتا يقرب كل ما المود بتاعى يتظبط

بس فى مشكله هاعمل ايه طول الليل والنهار اللى جاى كمان ساعه ده؟

اكتب شويه

لا ماليش مزاج كالعادة يعنى

طيب تخلصى حاجات الكورس

ربع ساعة الحاجات خلصت

طيب ايه ؟

مافيش غير الدعبسه فى الاوراق القديمة

بدات اطلع ورق قديم ليا

يالله على دى ايام

ورق من ايام ابتدائى واعدادى

امضاء صحابى على كشكول قديم.نوت قديمه فيها كلام مختصر مش عارفه معناه دلوقتى

خطى اللى زى نقش الفراخ على رائ استاذ ابراهيم الله يمسيه بالخير

وكانت دايما حجتى

ان ده خط العباقرة .اينشتاين ماحدش عرف يقرا النسبيه علشان خطه :)

الصبح طلع وانا لسه بدعبس

قمت عملت فطار

ياااااااه من زمان قوى معملتش فطار ولا فطرت

اكلت القطط ولعبت معاهم

ووقفت فى البلاكونه ابص للشمس الى بدات تستخبا ورا السحاب

كانت على وشى ابتسامة مش عارفه سببها ايه

بس ده اكد لى ان قرارى كان صح

طيب اليوم لسه طويل

خلاص بقى هاكمل الحاجات اللى سبتها افكار بس

وقولت اسجل اليوم ده

اليوم اللى بدا بمج قهوة باللبن

و قررت فيه قرار ونفذته .وسعيده بتنفيذه

على امل ان قراراتى فى المرحلة اللى جاية تتنفذ وابقى سعيدة وانا بنفذها

صباح الخير

شيماء حسن

1\11\2009

1ظهرا