Powered By Blogger

الجمعة، 15 أغسطس 2014

اكتشافات صغيرة لها مغزي

 اكتشفت اني طول الوقت -بالمعني الحرفي لكلمة طول الوقت -بكافح تبقي نفسيتي مرتاحه او متزنه او اعرف اخد نفسي من غير ما احس اني بغرق وده اخر نفس ليا

طول الوقت بضغط علي نفسي علشان اقوم كل يوم الصبح

بضغط علي حياتي علشان اتعامل مع ناس مبحبهاش بمجرد ان في صله دم مابينا

بضغط علي اعصابي علشان متعصبيش متنرفزيش معيطش ما اخافيش

بضغط علي افكاري انها ماتشتش في سكك عارفه ان اخرها مسدود

بتعامل مع حالات الهلع بمبدا اكتمه وهو هايروح لحاله

بتعامل مع نوبات الشعور بالذنب علي حاجات انا معملتهاش 
                                                                                                                                                                        
مش كل حاجة ليها حل
ومش كل حل هاريح
في حلول خلقت لتفشخك اكتر ماهي بتحل                                                         
شيماء حسن
15/8/2014

السبت، 19 يوليو 2014

فى عز الضلمة فى نور


بصيص نور صغير بيعافر فى عز الضلمة علشان يعرف يكمل

البصيص ده ممكن يكون اى حاجه صغيرة ماتكونش واخد بالك منها

فى نسمة هوا جاية فى يوم حر
فى مزيكا اعلان بتحبها
فى رسالة جاية من حد متتوقعهوش
فى مكالمة مش فى ميعادها
في انك فجأة تحس انك مرتاج البال

في انك تعمل حاجة تستغرب فيها نفسك
تكتشف حاجات جديدة  فى الدنيا خارج نطاق الالكترونيات

من الاخر بصيص النور ده جواك بس انت اللى مش حاسس به
افصل كل حاجة حواليك  ودور حوالين الكون
اعرف ان انت جزء صغير منه وسبها على الله

شيماء حسن
20/7/2014



الثلاثاء، 6 مايو 2014

حوليات 9 : الفنارة

على الضفة الاخرى يوجد الفنارة
بضوئها الساطع وسط العتة
وانا لا املك قارب للنجاة من هذا الظلام
ولا استطيع ان اسبح

كل ما املكه التساؤل
ماذا لو ؟
 ماذا لو كانت الانارة فى مكان واحد فقط يملؤة الصخور؟
او كانت تلعب دور الشمعة لجذب الفراشات اليها لتحرقها  ؟
او ربما تكون ضوء ساطح من اثر هلاوس الوحده؟
فى جميع الحالات
انى اهذى, اهذى بشهده, اهذى بعمق
اهذى لدرجه انى  هناك على تلك الفنارة وارى الشاطئ من بعيد
وارانى اتسال؟
هل انا انا ؟

ام انا مجرد انعكاسا لعوالم اخرى قد عشيتها فى احلامى ؟

شيماءحسن 
7/5/2014
1:49 صباحا

الأحد، 23 مارس 2014

حوليات 8 : عن نغزات القلب





عندى نغزة بتيجى فجأة فى القلب 

غالبا بتكون نغزة الدفاع على اخر نفس بيطلع من جسمى بعد كابوس من اياهم 

او بتكون نغزة قريفة من المعافرة  اللى بعدها يجيلك قافلة من الكون كله

او النغزة ة بتاعت مليون فكرة ف دماغك بس مافيش كلام بيطلع على الورق

او ساعات بتكون نغزة التوهان بنظرتك لنفسك بعد 5 سنين ادام 

بس الاكيد  اكبر نغزة  معششه جوه قلبى وغالبا مابتمشيش

هى نغزة وحشتك وانت مش موجود 

شيماء حسن
23/3/2014

الاثنين، 3 مارس 2014

حوليات 7: عن المحاولات الفاشلة لحياة بائسة

 
حياتنا كلها تتلخص فى اننا بنحاول نعمل حاجة 
وعن محاولاتنا الجادة فى اننا نعرف اصلا هى ايه الحاجة اللى احنا عايزين نعملها 
بتنتهى فى الاخر اننا بنعمل حاجة تانية خالص 
وبعد فترة  بنحاول نعمل فيها البدع علشان تبقى اللى احنا عايزنها 
 محاولاتنا مش بتنتهى عند حاجة معينة محاولاتنا بتبدى كل يوم الصبح 
انك تحاول تصحى وتقنع نفسك انه يوم هايكون فيه حاجة عدله

عن محاولاتنا فى اننا نشتغل حاجة بنحبها وتجيب فلوس تقدر تكمل بيها باقى الشهر

عن محاولاتنا اننا نبقى فى علاقة حب مستقرة من غير اى عقد وكلاكيع من اى حد حواليك
محاولاتنا الجادة جدا فى انننا نتنفس هواء نضيف بعيد عن اى ريحه غاز مسيل للدموع ولا تراب متهبب باى فيرس

محاولاتنا الجاده جدا ويمكن تكون الاهم اننا نعرف ننام بدون ارق وبدون كوابيس 
بدون اى خوف من اى حاجه هاتحصل بكرة 

عن محاولاتنا اننا نستمر فى اى حاجة فى حياتنا علشان هى دى المفروضه وخلاص 

عن محاولاتنا للتمرد عن كل ماهو تابو وتلاقى فى كل مرة بتحاول فيها حبل كبير بتتشد منه اقوى من الاول

 عن محاولاتنا للاستعادة ببعض الادوية  بس مافيش حاجه بتحوق الادوية اللى ممكن تاخدها علشان تخليك تحاول بنفس وصدر رحب كده  مش بتعمل حاجة غير انها بتخلى عملية صحيانك من النوم فيها شبه معركة يومية 

حياتنا اتحولت بقت عبارة عن محاولات يومية اللى غالبا بتبقى فاشلة  فى اننا نعيش يوم من غير مانحس ب اد ايه الحياة بائسة 

عارف انت الكلام اللى بيتقال" انت اللى فى ايدك تعمل الحاجة اللى انت عايزاها "
الكلام ده صح على فكرة بس تعمل ايه فى محاولات وصولك للى انت عايزة لما يجى اللى انت عايزة مابقش عندك نفس ولا طاقة انك تعمله 

حتى محاولاتى للكتابة  اصلا باتت بالفشل 

حتى لما تبطل  تحاول تعمل  اى حاجة  بيكون فى جزء منك اللى لسه بيتفس ده وعنده حاجه بيقعد يزغد فى قلبك طول الليل فى محاولة منه انك ترجع تحاول تانى 

 المحاوله طبيعه بشرية نازله فى الابديت البشرى من اول سيدينا ادم لحد اخر واحد هايتولد 

 حتى وانت بتموت  هتحاول تاخد اخر نفس ليك فى الدينا هايكون بصعوبة برضه واندهاش انه لسه بدرى 
علشان متندهش ابقى حاول وانت بتاخد اخر نفس ليك فى الدنيا تبقى مبتسم انك على الاقل حاولت تعيش الحياة اللى تستحقها 

شيماء حسن
3/3/2014
10:20 PM