Powered By Blogger

الجمعة، 22 أبريل 2011

صفحة بيضاء


صفحات جديدة بيضاء تراودني عن ممارسة فعل الكتابة
دائما ما يرهبنى اللون الابيض فهو يذكرني بعجزي عن عدم ملء السطور بالكلمات التي تتصارع بداخلي للخروج الى النور كل ما يدور فى ذهني الان بأن
الكتابة فعل احمق لمن يمتلكون نفسية معقدة

فعلا تلك هي المسألة

شيماء حسن
السبت
23/4/2011
1:00 صباحا

نقطه ومن اول السطر


ليه اخترت خلفية بيضا للشكل الجديد للمدونة ؟
يمكن علشان بحس بيها بالبدايات الجديدة لكل حكاية بتتكتب او علشان بتفكرنى بلون الورق
لون الصفحا الابيض عندى بيستفزنى ويحطنى فى تحدى
كانه بيقولى ها هاتكتبى حاجه ولا هاتكسلى كالعادة ؟
اللون الابيض المرة دى كانه بيقولى نقطه ومن اول السطر
فكرت قبل كده فى انك تحط نقطه وتبدا من اول السطر حياتك ؟
كام مرة النقطه بتوه منك وانت بتحطها فى اول السطر
ولما تلاقيها يكون الوقت فات .
طيب بلاش دى
كام مرة الحياة عندك بتحسها كانها دواير لما تخلص اللفه بترجع تانى من اول وجديد
لما تنضف اوضتك هايجى يوم تنضفها تانى
طيب جربت تنضف روحك اللي مليانه غبار ؟

مافيش حاجه مؤكده الا لحظه الادراك
لما تبدا تكون قطع البازل لحياتك والصورة توضح من بعيد
الخوف مش فى لحظه الادراك الخوف من انها تيجى متأخر بعد ما اللي حواليك يزهقوا من توهانك فى الحياة ويمشوا

سمعت كذا مرة قبل كده
هاتفضلى تايهه كده كتير ؟
القشرة اللى بره اللى شيفينها توهان هى مجرد قشرة لعالم انا مؤمنة بيه وعايشاه
الخزعبلات اللى بيقولى عليها هى انا مهما كانت الحقيقة مش هاتغير فى مسارات تفكيرى
هاتفضل انا
انا لما القمر يطلع كل شهر بفرح والمطر لما بينزل بعيط ولما بسمع منير فى الشارع بالصدفة بقول اكيد فى حاجة حلوة جاية قريب

القدر ...
هو دايرة اكتمال الحقيقة اللى فى اكتمالها بنقابل علامات حدوثه
حتى لو كان الموت ؟
حتى لو كان الموت ... العلامات ايه غير انذارات لحاجات هاتحصل لنا بالخير او بالشر

نقطه ومن اول السطر
ايوا انا ببدا من اول السطر دلوقتى
صحيح انى كل ما اخد قرار فى حياتى بتوه اكتر جوه نفسى واتلخبط
انا متلخبطه دلوقتى من حاجات كتير بتتبنى جوايا وقرارات لازم اخدها فى الوقت المناسب
النقطه تايه منى فعلا بس مش خايفه لانى عارفه ان اول السطر دايما معايا

شيماء حسن
السبت
23/4/2011
12:40 صباحا