هذيان موجه اليه

فى المطلق كده ماحدش هايفهم حاجه من الكلام ده الا المقربين من الدايرة وفى العموم كل الخطوط المستقيمة بتقفل دايرة حواليه

لما قررت انى اكتب بعد فترة طويله جدا كتبت الكلام اللى كنت بقوله لربنا فى الفترة الاخيرة ولما قرتها كانت ملخصها ليه وايه الحكمة فى كده ؟ وكالعادة مافيش اى اجابات فقررت انى استنى اى علامة واكتفى فى التأمل فى ملكوت ربنا احسن

لو كان حد قالى من خمس سنين بالظبط انى هاكون فى المتاهه دى عمرى ماكنت هاصدقة علشان كده متقولش انا انسان صاحب مبدا الا لو وقعت فى تجربة وثبت على موقفك غير كده متتكلمش كتير وتدى فى نصايح مالهاش لازمة

لاحظت فى الفترة الاخيرة انى فى الوقت مابين فتحى لباب بتنا بقف شويه بسند على الحيطة بتنفس كأنى باخد اخر انفاسى واحط قناع البنى ادمه الطبيعية وابتسم وادخل بتنا بتنجح كتيراوى بس الخوف انى من كتر تبديل الاقنعة معرفيش انا مين فيهم وده وارد جدا حاليا

صوت الساعة بقى يعصبنى الايام اللى فاتت كأنه بيقولى مافيش حاجة ثابتة وان الايام بتجرى
وكنوع من الكوميديا السودا قررت اشيل بطاريات الساعة واخلى نغمة المنبة اثبت مكانك

لما اتعملى بوست اللى كنت كتباه اكتر من 3سنين "ومن الهذيان ماقتل هكذا ابدا او هكذا انتهى "
دى كانت علامة على ان فى جريمة قتل هاتحصل بس ماحدش عارف مين فينا هايقتل التانى


شيماء حسن

4-4-2012