عـلامات فى ثوبها الجديد

الصفحة فاضية قدامى بقالها اكتر من 3 ايام
عايزة اكتب حاجه جديده مش عارفه
فى حاجات كتير اوى فى دماغى مش عارفه اطلعها فى صيغه كلام
والكلام لما بيكتم عندى جوه بيخلينى فى حالة مزاجيه مش تمام
كأن فى حاجة محبوسه جواك وعايزة تطلع ومش لاقية الطريق المناسب علشان تطلع

قررت اغير شكل المدونة بتاعتى
اصل شكلها القديم كان كئيب اوى مع انه كان مميز بس قررت انى اغيرة
وبدات ادور على صورة لبنوته ماشيه على البحر وسايبه علامات وهى ماشيه
وادور وصحابى يدوروا معايا لحد ما رسيت على 3 صور بقيت مش عارفه اختار مابنهم
فعلا صدق اللى قال عايز تحيرة خيره
وكنت عايزةاعمل الخلفيه مبهجه اى حاجه مبهجه يمكن تضيف نوع من البهجه على الكلام اللى هاقوله
كنت بفكر فى ابيض فى موف زى ما هابيض اوضتى كده
عايزة احس ان المدونة كانها اوضتى واشخبط فيها زى مابشخبط بالوانى على حيطان اوضتى.
الوانى اللى بقالى كتير ماطلعتهاش من مخبئها مع انى مجهزة الحيطه علشان ابدا الوانها بشخابيطى
علشان عارفه انى كده كده هابيض الاوضه قريب فمش هاتفرق انها هاتطلع حلوة ولا وحشه.

طول عمرى مش بعرف ارسم بس بحب امزج الالوان على بعض وطلع الوان جديده
فكرة ان لون جديد يجى بعد مزج لونين مختلفين مع بعض فكرة فى حد ذاتها مثيرة
كانك بالظبط كده هاتعمل دمج مابين شخصيتين مالهومش اى علاقه ببعض يطلعولك فى الاخر ناتج جديد ومختلف

مهما كان درجه اختلافه بس حاجة جديده.

فى الفترة الاخيرة حصل حاجات كتير اوى

ليا ولصحابى

قرارات كنت لازم اخدها وقرارات كنت مأجلها لحد ماجه الوقت المناسب انى اخد خطوة فيها

والسؤال هنا

هل هو ده فعلا الوقت المناسب؟

وامتى يكون هو ده فعلا الوقت المناسب؟

علامات كتير قالتلى ان ده الوقت المناسب انى اخد القرارات دى

العلامات اللى من كترها قربت تنطق وتقولى اتحركى بقى

ممكن اكون تهت فترة طويلة عن حاجات انا بحبها او بؤمن بيها

بس المهم انى ادركت ده وبدات ارجع فعلا

عـلامــات فى ثوبها الجديد

هاتكون نافذه على العوالم السبع اللى بكون فيهم

انا

مش حد تانى

شيماء حسن

4/8/2010