عن السحر اللى لسه موجود ونقطه الصفر والعلامات المفقودة

جربت كده تبص للسما . مش تبصلها وخلاص لا بصلها وخد نفس عميق من جوه وطلعه براحه

وانت بطلعه طلع معاه كل حاجه مضيقاك وعملالك قلق فى حياتك

بص للسما وتأمل حكمه ربنا فى الكون.

اسأل نفسك انا مين ؟

السؤال مش سهل زى ما انت متوقع

السؤال صعب جدا فى ظل الدايرة اللى انت حاطط نفسك فيها

دايرة الشغل والبيت والفلوس والحياة

الدوامة اللى ممكن تأخدك من كل حاجه بتحبها

احيانا الدايرة دى بتدخلك عوالم تانيه وتخليك تفقد التركيز والثقة فى اى حاجة كنت بتؤمن بها فى حياتك

لو انت من الناس اللى بتؤمن بالعلامات هاتفقد القدرة انك تصدقها

وساعتها هتبدا فى رحلة البحث عن العلامات المفقودة فى حياتك .او بمعنى اصح العلامات اللى ضيعتها فى حياتك بعدم قدرتك على استيعابها وفى رحله البحث دى هاتقابل السحر اللى لسه موجود جوه كل واحد فينا

سحر له قوة هايلة على قدرة البنى ادم فى تخطى اى عواقب ممكن تقابلة

السحر ده مدفون جوه كل واحد فينا اللى روحه تقدر تستوعبه كويس هايقدر يحقق كل حاجه بيحلم بيها

قريت من فترة الخيمائى لباولو كويلو

وعرفت معنى ان كل واحد عنده اسطورتة الذانية وعنده الامكانيه دى انه يحققها بس يؤمن بنفسه ويتبع علاماته و يسعى ويحققها حتى لو كان المجتمع يحاول يكبته بعاداته وتقاليده

صحى السحر اللى مدفون جواك بقاله فترة لحد ما روحك بقى عليها تراب وارفع راسك للسما

وبص كويس لنواميس الكون واعرف ان فى حاجات اكبر منى ومنك فى الكون صعب استيعابها بس مممكن نحس بيها

طلع نفسك من دايرة النمط والتقليدية وحارب اى تناقضات جايه من اى شخص بيحاول يهدم عزيمتك على فعل اى حلم معتبرة هو جنون بالنسباله لانك انت كده بتكسر نمط التكرار والتقليد عنده

خد نفس عمييييييييق وطلعه بهدوووء
واعرف كويس ان

every new minute we spend....is a new chance to change everything

شيماء حسن

18/7/2010