ارهاق بسيط

نانسى :انتى مالك شكلك فاصل ليه كده

ارهاق كل ماحد يسال بقول ارهاق

نوم بقلق واحلام سخيفه ومقلقه

نوران:لازم تروحى للدكتور يابنتى حرام عليكى نفسك

ساعات كتير بتقلب بكوابيس وبصحى بفتكرها كلها

دينا صبرى:انتى لسه تعبانه ؟ طيب فيكى ايه اتكلمى

الاضاءه خافته فى اوضتى بصحى مرعوبه من انعكاسات الضوء

وبقول ياترى ده كان حلم ولا حقيقه

احمد اخويا:حالتك بتدهور يوم عن التانى انتى مش شايفه عينك عملت ازاى انتى عمرك ماكنتى كده

الاسد رجع تانى بيطاردنى فى الاحلام

المرة دى راجع ومعاه القطيع كله

ماما:اخر مرة بصيتى فى المرايه كانت امتى؟

انتى مدركه اللى انتى بتعمليه فى نفسك؟

المرايه انعاكسات انعكاسات كل مرايه بشوف فيها نفسى بطريقه مختلفه

اخر انعكاس كنت عميا ومديت ايدى وشدينى لجوه المرايه

وصحيت مفزوعه

Jack : why ur eyes look so sad like this?get some sleep dear

قبل ما انام بفكر فى حاجات غريبه ممكن تحصل

اخر مرة حلمت بالمسرح بس ماكنش فى جمهور

وبتكعبل فى اخر خطوة للرقصه فى طوبه

ماعرفيش ظهرت منين

الدكتور:لو ماتحسنتيش على الدوا ده هانعمل تحاليل تانيه ونشوف

تعالى بعد اسبوع

الاضاءه خافته فى شارع ضلمه

وطيور طايرة فى كل اتجاه وبحاول اجرى

مش بعرف

عمرو :ركزى فى حاجه واحده بس ماتبقيش هائمه كده فى كل حته شويه

اركزى

وضع الثبات هو المسيطر

مفترق طريق واضاءه زرقاء وصوت نهر من بعيد

ولازم اختار

صوت دقات الساعه جاى من مكان ما

ومش مخلينى اركز اختار انهى طريق

احمد ندا: اذكرى ربنا كتير قبل ماتنامى علشان الرتابه هاتخليكى تنامى

الكعبه وصوت اذان من بعيد وطيارات بضرب قنابل من فوق

بس القنابل بتترد تانى للطيارات

والناس بيذكرورا ربنا جنبى وانا واقفه باصه للسما

بصحى على صوت الاذان مفزوعه

القطط بتاعتى : مياو مياو ميااااووو

متهيالى صوتهم وهما بيصحونى كل يوم من اثر حلم مزعج اخر

تك تك

تك تك تك

تك تك

ساعات كبيرة بحجم الحيطه فى كل مكان

وكل دقه بتعدى بطلع جواها طيور غريبه الشكل والمعالم

وبتفتح مرايات فى حتت تانيه

اضاءه من بعيد وصوت حد بيقولى ماتخفيش

المدير: انتى كويسه شكلك تعبان انهارده؟

لا ده مجرد ارهاق بسيط

شيماء حسن