فضفضة مع ناس وحشونى

 
القصة بدات لما ماما قررت تروح القرافه تانى يوم العيد الصبح بدرى
 جئت فى دماغى انى اروح معاها وليه لا يعنى 
 عايزة اروح اشوف المقابر بتاعتنا بما انى بقالى فترة بيهف عليا فكرة الموت 
لما قولت لنوران قالتلى رايحة تزورى مين؟
قولتلها :العائلة كلها هناك يانوران فرع العايله بتعنا انقرض خلاص
فى المدخل بتاع المقابر ماما بتقولى اعرفى المكان كويس علشان ماحدش عارفه من اخواتك بدل ما تحتاسوا 
التزمت الصمت وافتكرت عمتى  وهى بتقول العيد الصغير بيجى قبل العيد الكبير
   
السلام عليكم ورحمه الله وبركاته انتم السابقون ونحن اللاحقون
انتم السابقون ونحن اللاحقون
ركزت فى الكلمة اوى 
يعنى احنا كده كده رايحين هانلحقهم فى يوم من الايام 
طيب ليه الهرى اللى بيحصل فى حياتنا ده يحصل اصلا
اها بننسى كتير اننا هانموت الدنيا تلاهى فعلا وده خلانى اول ما اوصل
عند المقابر بتاعتنا ماحستيش بحاجه خالص غير انى مرتاحة
الراحه دى خلتنى اتسال هو انا مرتاحه اوى كده ليه
يمكن علشان المكان هادى بشكل مريح ؟
ولا انا هاموت قريب ؟
سلمت على الموجودين وقرايت قران 
وبعدها لاقتنى بتكلم معاهم
جدو
 ازيك ياجدو انا مش عارفه الكلام ده هايوصلك ولا لا بس حبيت اتكلم معاك شويه
انت اكيد مش عارفنى لانك ماشوفتنيش 
انا شيماء بنت حسن ابنك
اها مش حسن جاب بعد احمد ومحمود احسان سماها على اسم تيته وانا بقى الصغيرة
كان نفسى اشوفك اوى ياجدو بجد كان نفسى اقعد معاك ومع تيته تحكولى حواديت بتقول ايه بابا عامل ايه؟
بابا مش كويس تعبان اوى ياجدو وصحته بتدهور كل يوم عن التانى والادوية مابقتيش بتجيب نتيجة هو وعمتو مريم هما اللى فاضلين من العايلة والاتنين صحتهم فى النازل
عمتو بقالى كتير ماشفتهاش انا عارفه انى مقصره معاها  بس بيقولوا انها كويسة 
معلش ياجدو هاروح اتكلم مع عمتو نادية شويه
ازيك ياعمتو  وحشتينى اوى 
فكرانى انا شيماء بنت حسن ايوا كبرت اهوه ياعمتو مش كنتى دايما بتقوللى كلى شويه علشان تكبرى وتطولى 
انا لسه مش باكل بس الكبر مالوش علاقة بالاكل 
كده كده هاكبر ياعمتو سواء رضيت بده او لا 
لسه عمو حسن كان عندنا قريب هو وعياله مش جاب 3 عيال عفاريت ماشاء الله ربنا يخلهولهم  احنا على طول على اتصال معاه فيه الخير بيسال على بابا على طول 
زى ماسمعتى كده احوال بابا وعمتو مريم 
كنت لسه عند بيتك قريب وافتكرت لما كنت باجى اقعد عندكوا واستخبى تحت السلم من العيال وانتى تيجى تطلعينى وتضربيهم وتزعقلهم وتقوللهم مالهومش دعوة بيا 
دى بنت ناس دى 
ماكنتش فاهمة يعنى ايه بس كنت مبسوطة ان فى حد بيحمينى من العيال اللى بتحاول تخلينى العب معاهم بالعافية دول
 وضحكت لما كبرت عرفت يعنى ايه بنت ناس
احنا كلنا ولاد تسعة ياعمتو الموت مش بيفرق احنا اللى هانفرق يعنى 
ياريتك كنتى سبتينى العب معاهم كان زمانى دلوقتى عارفه اتعامل مع العوء اللى بيحصل حوالينا ده بس حصل خير بقى
المهم انا هاروح اتكلم حبه مع ابله ماجدة بنتك شوية
ابله ماجده  كل اللى فاكراه عنك حاجات مبهمة لانى كنت صغيرة ساعتها
فاكرة انك كنتى بتحبى نونا اختى اوى وكنتوا صحاب وكنتوا بتخرجوا كتير وكنتى بتجبيلى لعب معاكوا 
فاكرة حادثه موتك المفاجئة وعرفت بعد ماكبرت ان الاكتئاب اللى جالك بعد الحادثة هو السبب وفاكرة انك لما مشيتى اختى جالها انهيار عصبى وقعدونى وقالولى انك روحتى عند ربنا ماكنتش فاهمة ساعتها اوى بس كنت مستغربة ادام روحتى عند ربنا الناس زعلانة ليه طيب مش انتى روحتى فى حته حلوة ؟
نونا عاملة ايه ؟
اسكتى مش هى ىخلصت دراسة وسافرت اليونان واشتغلت واتجوزت وخلفت 
يوسف ويارا 
انا مسمياهم التتار لما بيجوا البيت بيقلبوا سيرك قومى
نونا لحد دلوقتى لما بيجى سيرتك بدمع تصورى 
هى ماجتش ليه ؟
هى مع جوزها فى الاسماعليه علشان هو ماسك مدير الفرع هناك وبتيجى القاهرة اجازات بس
معلش هاخليها تيجى المرة اللى جاية متزعليش وهاقولها انك سالتى عليها
هاروح اكلم مع عمو محمد شوية
ازيك ياعمو محمد انت وحشتنى اوى اوى انا لسه شايفه باسم ابنك قريب ماشاء الله بقى شبهك اوى كان نفسى اشوف شيماء اللى انت سمتها على اسمى بس كنا فى الشارع وماحبتيش اطلع علشان عمتى ماتزعليش انى مش بروحلها واروح لطنط سلوى 
عمتو عاملة ايه ؟ انت مسمعتنيش وانا بقول لجدو ان صحتها فى النازل 
تعبت اوى بعد انت مامشيت 
زى ما انت عارف كانت مفاجئة بالنسبالنا كلنا 
مرة كنت رايح المستشفى تعمل فحوصات عادية وتانى يوم يحصل اللى حصل 
فده كان علينا صعب 
زعلان منى علشان حضرت جنازتك وتعبت بعدها 
معلش متزعلش بس ماكنش ينفع محضريش 
انا فاكرة  لما بابا وماما سافروا وسابونى فى مصر وقعدت عندكوا سنة 
صحيح كنت صغيرة اوى بس شوفت الصور والهدايا اللى كانت حواليا منك ومن عمو ماهر وكنت مسمينى بنبوناية العايلة انا فاكرة انك قولت لو جبت بنت هاتسميها على اسمى بس ماكنتش عارفه انك هاتعمل ده بجد
انا هاروح اكلم خالتوا شويه علشان ماما قربت تخلص قراية قران
خالتوا ... يااااااااه واحشتينى اوووووووووى فوق ماتتصورى
عارفه انى كنت بشوفك كتير ساعة محمد محمود وكنتى قلقانه عليا وماكنتش عايزة اقولك انا مالى وكنت حاسة انى هاموت ساعتها اوى
انا حاطه فى دماغى دايما انك انتى اللى هاتيجى تاخدينى فى حضنك علشان ماخفيش وانا رايحه اقابل ربنا علشان كده كنتى دايما معايا كل ما انزل الميدان ولما ارجع سليمة 
اقول اهى ياصابت ياخابت مش هاتفرق انهارده من بكرة  الحمد لله 
بتقوليلى ايه اللى رجعك للسياسة مش اتفاقنا من ساعة ثانوى تنسى بقى الليلة دى 
ماكنش ينفع انسى بعد السنين الاخيرة واللى حصل فيها ده حصل بلاوى هابقى اقولك عليها بعدينمش ماما قريب كانت بطلع هدوم من الدولاب وبدعبس معاها لاقيت الشال بتاعك اللى كنتى بتغطينى به لما كنت باجى اقعد عندكوا
ياه حساها كانها  امبارح مش فات عليها 10 سنين 
انا عارفه انك زعلانه منى انى ماجتلكيش لما طلبتى تشوفينى 
ماكنت لسه قادرة استوعب واشوفك تعبانة كده 
ويوم ماقررت اروحلك ماما اتصلت وقالتلنا الخبر
معرفتيش امشى فى جنازتك لانى ماكنتش مستوعبة كنت حاسه ان فى حاجه غلط بتحصل وانتى بتهزرى وهاتيجى تانى 
انا فاكرة كويس اوى اليوم ده فضلت قاعده فى بيتكوا لوحدى بستقبل كمية الناس اللى جاية من كل حته تعزينا
 وقعدت فترة مابدخوليش البيت علشان عارفه انى مش هالاقيكى موجودة 
كان كفاية عليا لما كنت بزهق منهم فى البيت اجى اقعد مش لازم اتكلم كنتى بطبطبى عليا وتوقليلى سيبك من العايله دى وتعالى اقعدى معانا
ولا قعده الكحك والبسكويت بتاع العيد ولا الاكل بتاعك اللى بيتاكل من الحلة قبل مايتفرغ وانتى تزعقلنا وتطلعينا بره المطبخ بالكبشة 
وفاكرة لما الناس كانت بتتريق على محمد منير وكنتى بتقولى حرام عليكوا ده واحد عيان لحد ماعرفنا انه كده طبيعى فقعدنا نضحك
ماما...  ماما زى ما انتى شايفة كده بتقاوح اهى جايه انهارده وهى مش قادرة تمشى بس مش عايزة تقطع العادة
وبابا زى ماسمعتى واخواتى كويسين ومحمود اتجوز اخيرا ولسه مخلف فى رمضان 
وانا مممممم مش عارفه بس كويسة الشكل العام من بره كده كويسة 
اما نفسيا وجسديا ربنا وحده اللى عالم بقى انا فيا ايه
سيبك منى صحيح مش امل البت المفعوصة بنتك اتجوزت وخلفت وبقى عندها بنتين ماشاء الله عليهم
وعد وسجى اسميهم غريبة صح بس عجباها ما انتى عارفه دماغها ياخالتو
نشفة
وابله ندى كويسة قاعده لوحدها فى البيت دلوقتى وماما مش سيبها فى حالها عايزها تتجوز باى شكل من الاشكال وخلاص  بعد ماعمو الله يرحمه 
مشى بعدك ياخالتوا بسنتين هو مش هنا راح  ادفن فى مدافن العايله بتاعتوا
داليا ممممم داليا اقولك الحق ولا ابن عمو 
داليا اتجوزت خالد  اها خالد ياخالتو اللى كان معاها فى الشغل
وسافرت اسكندرية وعرفت انها خلفت وعندها 3 ولاد ماحدش عارف عنها حاجه بس بيقولولى انها بقيت تتكلم معاهم وهما بيروحلها يزروها 
كلمتها فى مرة معرفتيش اقولها ايه وقفلت واقعدت اعيط 
ابله حنان كويسه حازم وعمرو كبروا ماشاء الله عليهم حازم دماغه حلوة اوى ماشاء الله عليه الواد لو فضل على كده هايطلع حاجه كويسة  عمرو بلطجى بس على ابن ناس زى ماهو ودماغه فى الالكترونيات ايه ماقولكيش يعنى 
وعمو طارق شغله فى البترول فى النازل من ساعة الثورة
الا صحيح انتوا متعرفوش مش احنا عاملنا حاجة كده بيقولوا انها ثورة من سنة ونص وقال ايه مبارك مشى واتحاكم هو والشله اللى حواليه وجه مكانه رئيس من الجماعة المحظورة اها الاخوان المسلمين تخيلوا بقى 
عشينا وشوفنا اليوم ده 
ماتفرحوش اوى كده ده  كويس انكوا ماشفتهوش اليوم ده 
ماحدش عارف بكره فيه ايه من زمن الاخوان المهبب اللى احنا داخلين عليه ده
بتقولى ايه بلاش تشاؤم
انا بحاول اتفائل الصراحة بس الجو العام مش مبشر بحاجة عدلة
ماما خلصت 
انا هاقوم وهحاول اجى تانى مع ماما وماحدش عارف ممكن اجى لوحدى واكون معاكوا 
نونس بعض ماحدش عارف 
السلام عليكم ورحمه الله وبركاته انتم السابقون ونحن اللاحقون 




شيماء حسن 
23/8/2012
12:57 صباحا