ويبقى الوضع كما هو عليه

الضريبة اللى بتخلينى اعرف اكتب كويس او بيتهألى انى بكتب كويس

الارق والاكتئاب
مافيش حاجه حصلت تخلينى احس بكده الا انى من فترة فى حاجات كتير اوى جوايا عايزة اكتبها مش عارفه اكتبها
الكلام بيهرب منى
العلاج الوحيد انى اجيب لتر ميرندا تفاح لانى بقالى كتير مش بشربها وبتفكرنى بايام زمان
واى حاجه بتقرقش زى بيك رولز والبس البيجاما اللى بحبها وافتح النور بتاع القرايه بس واقرا اى حاجه بحبها
حاولت اسمع اى حاجه معرفتيش, عايزة حاجه جديده تتسمع مش لاقيه
او بمعنى اصح كسلت انى ادور زى مابكسل اعمل حاجات كتير اوى
فتحت الصفحة للمرة المليون علشان اكتب عن الفليم مافيش حاجه فى دماغى
كأن الكلام وقف عند هنا وبس
زى ما صاحبتى اللى بقالها فترة ماشفتنيش لما جه الفرصه اننا نعقد مع بعض كنا قاعدين ساكتين
كأن الكلام برضه وقف عند نقطة ما ومش راجع تانى
لاقتها بتتصل بيا باليل وبتقولى نفسى اشوفك زى زمان بتضحكى من جوه وبتهزرى وماكنتيش بتعقدى فى حته
على اد الكلام ده فرحنى ان فى لسه صحاب بيخافوا على بعض على اد مازعلنى
انا فين من ده كله
اسئلة كتيرة فى دماغى والفجوة بتتسع
مش عارفة الاقى ليها اجابة
وفى بحث انى الاقى اجابة بتوه منى ومن اللى حواليا
فى المرحلة اللى فاتت كنت بتفرج على افلام كتيير اوى لدرجه الاحداث كانت بتدخل عندى فى بعض
كان فى فليم فيهم كانت واحده بتقول لصحابتها بعد جواز 25 سنة انها كانت شخصيه مختلفه عن دلوقتى بكتير بس ماتسالنيش انا كنت ايه لان مع الوقت بفقد جزء منى كل فترة لحد مابقيت شخصيه مبهمه
الكلمه دى علقت معايا اوى
كانى بقيت بازل والقطع بتقع منى فى دوامة الحياة
مش عارفه انا كتبت ده ليه ومش عارفه انا كتبت ايه اصلا بس فكرة انى بكتب فى حد ذاتها مفرحانى
والغريب ان اغنية هى اللى خلتنى اكتب تانى بعد اكتر من شهرين مش بكتب حاجه
وهى للاسف مرتبطه عندى بمشهد فى مسلسل Grey's Anatomy بمريديث وهى قررت انها تنتحر وتغرق
بس ماقدرش انكر ان الاغنيه سابت علامة معايا اوى لدرجة انى ارجعلها دلوقتى واقرر انى اسمعها واكتب الكلام الغريب اللى انا بكتبه دلوقتى ده
الاغنيه بتقول
all i need to bitter song to make me better
much better
all i need to write a bitter song to make me better
much better

ويبقى الوضع كما هو عليه الى ان
be better much better

شيماء حسن
26/9/2010
4:55 am